தயைநிழற்றி

வங்கியின் வாசலோரத்தில் நிற்கிறது

மின் கம்பியில் உரசாதிருக்கக்

கிளைகள் வெட்டிக் கழிக்கப்பட்ட வடுக்களுடன்

சுருங்காப் பெருங்கருணை சுரந்தபடி

வேறு திசைகளில் கிளைகள் நீட்டி

வாகனங்கள் மீது தயைநிழல் சாய்க்கும்

புலிநகக் கொன்றை.

பணம் வரையவோ அல்லது உள்ளிடவோ

ஓய்வூதியம் பெறுவதற்கோ

பாதுகாப்புப் பெட்டகம் புழங்கவோ

கடனுக்காகவோ

அடகு மீட்கவோ

என்று

கவலையும் அழுத்தமும்

எழுதிய முகங்களுடன்

வருவோரின் தலைமீது

கனிந்த தழல்களெனச் செம்பூக்கள் விரித்துச்

தாழ்ந்திருக்கும் கிளைக் கரத்தை

சற்றேனும் நின்று

யாரும் ஒருபோதும் கண்டிலரே.