நனி நாகரிகம்

தீப்பெட்டியில்

அடைக்கலம் ஆயின

இரட்டைக் கிளிகள்

வறுத்த சேமியாவில்

வாழ்கிறது

அணில்

அலைக்கற்றை பாயும்

செல்ஃபோன் கோபுரங்களால்

அலைபாய்ந்து தொலைந்துபோன

தவிட்டுக்குருவி

கூவுகிறது ட்விட்டரில்

பாஸ்மதி அரிசியில்

இளைப்பாறுகின்றன

இளமான்கள் இரண்டு

சவுக்காரத்தில் நுரையருந்தும்

பொன்வண்டு

மூட்டுவலித் தைலத்தில்

முன்னோக்கிப் பாய்கிறது

சூரப்புலி

பேரீத்தம் பழத்தின்

பெயர் சொல்லிப் பிழைக்கிறது

பிடரி உதிரும் சிங்கம்

பான்டா கரடிக்குச் சீனாவிலும்

கங்காருவுக்கு ஆஸ்திரேலியாவிலும்

கவுரவமாய் ஏதேனும்

பிராண்ட் கிடைத்திருக்கக்கூடும்

காடழித்துக்

கட்டடம் செய்ததில்

வாழ்விழக்கும் விலங்குகள்

நமை மறக்கினும்

நாம் மறக்க மாட்டோமால்

பிராண்டுகளில் இடம் ஒதுக்கி

கௌரவிக்கின்றோம்

நமது நவ நாகரிகம்

நன்றி மறவாததாயிற்றே

நண்பர்களே!

மழைக்காற்று

மழை பெய்கிறது

வாருங்கள்

என்றழைத்தாள்

எத்தனை முறை ஆனாலும்

பித்தனைப் போல்

மழையை ரசிப்பேன்

என்பதறிவாள்

கணினியை மூடினேன்

வாசற்படியில் இருவரும்

அமர்ந்துகொண்டோம்

வேறேதோ புதிய இடம் போல்

வேறேதோ பழைய காலம் போல்

சித்தத்தில் மழை

தித்தித்தது

எப்போது வரினும்

இடத்தின் தடத்தையும்

காலத்தின் குறிப்பையும்

துடைத்தழிக்கின்றது

மழை எனக்கு

தூறல் கிளர்த்தும்

ஈர வாசத்தில்

ஒருவித போதை

விண்ணும் மண்ணும்

விளையாடும்

பெருமுயக்கு அல்லவோ

மழை

நேராக மேகம் அனுப்பும்

அமிர்தத் துளிகளை

திசைகளில் எல்லாம்

சிதறடித்திருந்தது

கடுங்காற்று

’மழை வந்தாப்லதான் போங்க

காத்து கலைக்குது

நான் உள்ளே போறேன்’

என்றெழுந்து சென்றாள்

அழகிய மழையைக்

கலைத்தபடிச் சுழன்றடிக்கும்

அழகிய காற்றை

ரசிக்கத் தொடங்கினேன்

சமத்துவ பிரியாணி

மணமகள் (தீன்குலச் செல்வி)

’இருபது’ என்றார்கள்

(வயதல்ல)

மணமகன் (தீன்குலச் செலவன்)

‘எட்டு’ என்றார்கள்

(தப்பில்லை,

ஒன்பதாகத்தான் இருக்கக்கூடாது)

பெண்ணின் அத்தா

’பைஅத்’ ஆள் என்றார்கள்

(இனி அவர் மையத் ஆகாதிருந்தால் சரி)

பையனின் அத்தா

தப்லீக் என்றார்கள்

முதற்பந்தி முடித்து நின்றோர்

பல்குத்திக்கொண்டே

சீரகச் சம்பா பிரியாணியின்

ஈடிணை இல்லா நறுமணம்

பிடித்திழுக்க

பந்தியில் அமர்ந்தேன்

எதிர் வரிசையில்

சமிக்ஞை சலாம் சொல்லிப்

புன்னகைத்த

’சமரசம்’ பாய் ஒருத்தர்

சட்டென்று சுதாரித்துக்கொண்டு

சர்வீஸ் பாயிடம்

தாள்ச்சா கேட்டார்

’இறைவன் ஒருவனே’

எனக்காட்டும் விரலால்

(ஆட்டும் விரலால்)

திருப்தியுடன் மௌனமாகப்

பேப்பர் கோப்பையில்

பாயசத்தை வழித்துக்கொண்டிருந்தார்

எம் முஹல்லாக் கிளையின்

சகோதரர்

உண்ணும்போதும்கூடவா

வீடியோ எடுப்பது?

என்னும் அறச்சீற்றம்

பொங்காது பொறுமை காத்து

எக்ஸ்ட்ரா சிக்கன் பீஸ்

கேட்டுக்கொண்டிருந்தார்

சில்லாவில் சதம் கண்ட

சாதனையாளர்

அன்னக்கரண்டி

இலையில் சரித்த பிரியாணியில்

தற்செயலாய்

ஆறேழு ‘துண்டுகள்’

விழுந்துள்ளமை கண்டு

ஜாக்பாட் அடித்ததாய் மகிழ்ந்தார்

’ஜாக்’ தோழர்

(அல்லாஹு ஃகைருர் ராஜிகீன்

இறைவனே

உணவளிப்போரில் சிறந்தவன்)

இறைவனின் ஷுஹூதை

அதிகமாக்கிய பிரியாணியை

இரண்டாம் சுற்றும்

கேட்டுப்பெற்றோம்

நானும் பீர்பாயும்

நெற்றியில்

மந்திரமாகிய நீறணிந்த

நண்பருக்கு

பிரியாணி செய்முறை நுட்பங்களை

விவரித்தபடி சாப்பிடுகிறார்

குழந்தை முகம் கொண்ட ஹாஜியார்

அவரவர் அறிந்த விதத்தில்

எல்லோரின் துஆ வாழ்த்தும்

மனதாற நிகழ்ந்திருக்கும்

மணவீட்டார் மீது

சாந்தியும் சமாதானமும்

பரவச் செய்துவிட்டது

சமத்துவ பிரியாணி இன்று!

கனியும் தருணம்

இரண்டாம் பருவச் சுற்றில்

தள்ளிய குலைகள்

பழுக்கத் தொடங்கின

பப்பாளி மரங்கள்

அடர் மஞ்சளாய்

மாறியிருந்தன ஓரிரண்டு

வீட்டின்

சுற்றுச் சுவர் மீதேறினால்தான்

கைக்கெட்டும் எனக்கு

உறவினர்க்குத் தரல் வேண்டி

“பிடுங்கித் தர்றீங்களா?” என

வினயமாய்க் கேட்டாள்

மோவாயில் விரல்களைத்

தடவியபடி

மேல் நோக்கியபோது தோன்றியது

எவ்வளவு வன்முறையான சொல்

மிக இயல்பாகச் சொல்லிவிட்டாள்

‘பிடுங்க வேண்டாம்

பறித்துத் தருகிறேன்’

எனச் சொன்னேன்

பறித்தல் என்பதும்

வன்முறை அன்றோ?

கவர்தல் என்றார்

வள்ளுவரும்!

’எடுத்தல்’ என்பதிலும் சற்றே

வன்முறை இருக்கிறது

வாங்குதல் எனிலோ

வணிகம் தொனிக்கும்

என்ன யோசனை என்பதுபோல்

பார்த்தவளிடம் சொன்னேன்

’இரு, மரத்திடம் கேட்டுப்

பெற்றுத் தருகிறேன்’