அஞ்சினேன்
நான் என்னையே
நீ கிடைத்தபோது
நல்லுரை
நீயெனிலோ
கவியாக்க முயல்வேன் என்று
நறுங்கவிதை
நீயெனிலோ
இசையாக்க முயல்வேன் என்று
மெல்லிசை
நீயெனிலோ
தியானமாக்க முயல்வேன் என்று
அஞ்சினேன்
நான் என்னையே
நீ கிடைத்தபோது
நல்லூழ்
வேறாய் இருந்தது
நினையாதன எல்லாம் நடந்தது
ஞானநூல்
நீயானாய்
நல்லுரை நானானேன்
பெருங்கனவு
நீயானாய்
நறுங்கவிதை நானானேன்
மௌனம்
நீயென நின்றாய்
தியானம் நானென ஆனேன்
நினைவெனும்
ReplyDeleteமது அருந்தி
கனவெனும்
கருந்துளை ஊடே
பயணிக்கிறேன் நான்
எனக்கு
அலங்காரமும்
தேவையில்லை
ஆடைகளும்
தேவையில்லை
நீயே
நான் விரும்பும்
ஆடை
உன்னுள் ஒளிந்து கொள்கிறேன்
கருப்போ வெண்மையோ
சிகப்போ பச்சையோ
கந்தலாடையோ
பட்டாடையோ
எனக்கு எந்த ஆடையும்
வேண்டாம்
உடை மாற்றங்கள்
அலுத்துவிட்டது
ஒளிக்கு எதற்கு ஆடை
நிர்வாணமே ஒளிக்கு அழகு
இருளுக்கு ஏன் மறைப்பு
அதுதான் ஒளியை அழகாக்குகிறது
ஒளி-சத்தியம்
சத்தியம்-ஒளி
ஒரே பொருளுக்கு
இரண்டு பெயர்கள்
காதலில்
நிர்வாணமாவது
அலங்காரமாவது
இரண்டும் வேறல்ல
இருளில் தானே
ஒளி பிறக்கிறது
இருளுக்கு ஏன் மறைப்பு
பிதற்றல்களும்
முனுமுனுப்புகளும் தான்
என் பாடல்கள்
பிரபஞ்ச கடலில்
வாழ்வெனும் சூறாவளியின்
ஊடே
கலங்கரை விளக்கை
தேடும்
பாய்மரக் கப்பல் நான்
கடற்கரை மணலை
எண்ண துடிக்கும்
முட்டாள்தனம் எனது
உன்னை நினைக்கும்
அந்த நொடிதான் என் வாழ்வு
உன்னை நினையாதிருக்கை
என் மரணபடுக்கை
-ஜேபி